不要小看這間屋邨小學，它擁有最先進的天文望遠鏡，香港的日偏蝕影像，也是由這裡直播全球！
而一手打造這個天文科技橋頭堡的，竟然是個會考只有三分的學校技術員。
這位隱世天文王子，最愛「自製太空館」，曾花半年時間，打造兩層樓高的吹氣「波波池天象廳」，「屯門好細，但一樣可以望到好靚星空！」他興奮地說。
「睇到嘞！個太陽變咗月亮呀！」被喻為近五百年最壯觀的「世紀日蝕」在亞洲出現，只看到日偏蝕的香港，上週也掀起追日熱潮。週三早上七時許，位於屯門湖景邨的保良局梁周順琴小學下午校，門未打開，已有數百名由全港各地湧至的市民，在門外排隊，最多容納二百人的天台，擠得水洩不通，搞手鍾志民更是汗流浹背。
「估唔到咁多人嚟，我哋影到嘅日偏蝕影像，會即時電視及網上直播到世界各地，有成億人睇到呀！捱咗幾晚通宵都值得！」那管烈日當空，廿七歲的鍾志民仍興奮得大叫。事實上，為了向別人推介靚靚星空，他一直廢寢忘餐。好在，還有同樣熱愛天文地理的校長黃成焯，陪他並肩作戰。一老一少，成就了這間另類屋邨天文小學。
街坊校長成伯樂
讀地理出身的黃成焯，最愛短褲涼鞋街坊裝，見到操場有攤水，二話不說拿起地拖，曾鬧出有學生誤會他是校工的笑話。這個不拘一格的平民校長，對星空同樣發燒，他每個學生，都發半圓形的熒光「旋轉星圖」。記者問過不少學生，他們都說試過在學校的天台「頭岳岳」找尋北極星。黃校長說，學生對天文有興趣，是鍾志民多年努力的成果。
一切要由三年前一次「落湯雞」事件講起。黃校長說：「當年我哋開始搞觀星之夜嘅課外活動，邀請學生同家長喺學校天台觀星，點知好似今次去上海觀世紀日全蝕一樣，撞正多雲兼下雨，一粒星都搵唔到……」學生和家長失望之情溢於言表，「當時大家講笑話，如果學校有個天象館就好，真正無懼風雨！點知第二日
Ian（鍾志民）同我講：得喎！有得諗！」
校長一句話，激起鍾志民的雄心，「即晚通宵上網睇咗好多資料，諗咗好耐，要造一個好似太空館嘅天幕，由於要仿效真正天空投射影像，所以一定要半圓球頂，仲唔可以透光，於是諗到不如好似扭計蛇（扭計骰其中一個變種），用五、六十塊三角形紙皮砌，整個紙紮小型天象館。咁啱當時有個家長喺紙廠做，紙皮唔使錢，我買咗一百二十隻黑色鐵夾，成本三幾百蚊，但就整咗三個月，日日同啲同學義工𠝹紙皮！」鍾說。
DIY天象館
近兩年教育局新修訂小學常識科，加插星球和日蝕等天文現象內容，可容納十人的紙紮天象館，正好成為巨型教材，配以投影器講解天文歷史，大受歡迎，連鄰校都有師生過來參觀，「人人爭住排隊入去，畢業之後咩都可以唔記得，一定記得佢！」已畢業離校升中的黃同學說。
只是手作仔天象館用得多，紙皮開始裂開透光，
Ian開始想做一個更大更耐用的天象館，找校長商量，老伯樂笑笑口反問「有何不可」？於是就放手給鍾志民做。
但學校資源有限，只能資助幾萬元，於是鍾志民又再 DIY，「外國有得訂類似膠質球體形的大天幕，要五十萬！根本無可能，我見大陸啲遊樂場，好鍾意用吹氣床，於是就聯絡內地專造塑膠波波池的工廠，話要造一個一百八十度無摺痕嘅天幕，間間都話未造過，於是我用電腦設計咗個
3D軟件，又親身過廣州傾五、六次，搞咗半年有多，先至造得成。」
這個吹氣波波池式的 PVC膠天幕，內裡有個折射鏡，可以製造奇幻的星空效果，絕對是土法炮製 DIY，成本五萬有找，連市區名校都無的超級天象廳，竟然在屯門屋邨小學禮堂矗立！
上週六，鍾志民在學校禮堂向記者示範他的心血傑作，二百磅的大天幕，單單用強力的電動泵氣機泵滿氣，便花上一個多小時。千辛萬苦駁好數碼投影機，記者坐進這個六點七米高、最多可容納八十人的巨型天幕，仰望他自製的電腦模擬一百八十度旋轉星空，席地而坐，較斥資數千萬的太空館更感震撼，天空的星星恍似伸手可及，一剎那渾然忘卻身在尋常屋邨小學的小校園。
六十萬超強系統
作為學校的資訊科技大總管，由土炮大天幕到電腦室鋪設資訊網絡，鍾志民一手包辦，屯門區不少學生哥都識這個「
Ian哥哥」。上週三的日蝕團之後，他又着手籌備全港首個學校流動天文台，「整個系統要六十萬左右，可以追蹤天上小行星，天文望遠鏡可同時間連線到唔同電腦，坐喺屋企都可以觀星。」新系統費用全由保良局贊助，作為學校發展天文之用，今年十月啟用，全港中小學都可以登記聯網，成為觀星族。
這個天文發燒友，每月萬多元的收入都用作購買天文及攝影器材，「追小行星，要好多支鏡，我屋企望遠鏡全部放在學校，前幾個月為調校流動天文台系統，一個月一半時間都在學校過夜，根本無咩點返過屋企！」
鍾志民有個不簡單的童年。小時候他家住山景邨公屋，一梯六十伙，是該邨一大特色，住在七樓的他是孩子王，同輩小朋友壞了機動玩具，都找他修理，有「鍾博士」的外號。念中二時，在醫院做技術員的父親申請到公務員資助，送兒子到英國讀了兩年，令他大開眼界，「我整電子裝置特別叻，當時老師話，得啦！
Ian！你保管實驗室鎖匙，鍾意幾時去就幾時去（做實驗）；有次上化學堂做實驗，個老師特登整蠱學生，叫佢溝埋啲化學物料，結果發生輕微爆炸，大家驚呼，實驗室頂仲穿了個洞，個老師就哈哈大笑……呢啲教育方法，你永遠唔會喺香港見到。」
