史泰祖潮爸爸
問皮膚專科醫生史泰祖收過什麼父親節禮物?他記近唔記遠話:「現就讀美國哥倫比亞大學嘅細女(史雋皓)舊年提早放暑假返嚟,我俾咗張七百蚊
Sogo贈券佢,到父親節佢就帶我去買窄腳褲。」五十七歲的史泰祖訪問時,身穿的衫褲便是去年父親節禮物,「佢哋話咁著潮啲,好似後生咗幾年。」史泰祖說以前對父親節感覺不濃,近兩年仔女去了外國讀書,感覺即刻返晒嚟,「屋企靜咗好多,好開心有丹丹(二女史雋丹)喺度!」
史泰祖大仔史雋維九年前去了紐約讀書,現於彼邦從事金融業,細女又去了美國,只剩下患有唐氏綜合症、廿二歲女兒丹丹伴在身旁,史泰祖懷念一班小孩子在大廳爭電腦用的熱鬧情景。他嘆道:「佢哋大個咗好似燕子飛晒去,佢哋又有男女朋友,服侍男友都嚟唔切!」
日日父親節
現在週六、日會陪他身邊的,就只有在匡智松嶺職業中心寄宿的丹丹,丹丹鍾意睇愛情電影,為了父親,她不介意陪他睇打鬥片;她怕父親揸長途車容易眼瞓,會買定話梅在車讓他提神,又買花生給父親送紅酒。
今年父親節,他估計會如每個週日一樣,一家人先去教堂望彌撒,然後去粉錦公路的榮昌茶座,食豬扒包和煎雞尾包,最後一齊返上水度假屋游水,唯一不同是晚上會和哥哥、母親一起食飯。丹丹亦會親手做張咭,用英文寫上祝福語,望父親身體健康,網球打好一點,「不過我過幾日就掉咗。」
初初知道丹丹有唐氏綜合症,史泰祖都幾迷惘,「我希望當發場夢,亦有諗過搵人領養,但丹丹放在我手時,我已經決定勤力工作,驚我們唔喺度佢要有生活費。」
他們試過帶丹丹去會所吃飯,經理向他投訴,說丹丹搶了細路女的頭箍,兩夫婦連忙向人道歉;有時他們趕着赴約會,但丹丹中途犯錯,心急赴會的史泰祖亦會以女行先,要當面糾正女兒才可以再出發,「太太話唔可以俾佢輕易過關,一定要停車講妥才赴約,過後教就無用。教佢係無天書,要有耐性逐樣逐樣解釋。」
管家婆
現在丹丹不再頑皮,反而成了管家婆,要父親打電話匯報會否回家吃飯,史泰祖食飯時掛住講電話看報紙,丹丹會說:「唔可以做自己嘢,要同人傾偈。」採訪當日,史泰祖一時心急向太太講了句:「你收聲!」丹丹即替母親出頭,要父親道歉,史泰祖亦照做,「當時吞唔到啖氣,吞咗又無大不了,係個女叫我講對唔住,太太會更服氣,個女係可以將小磨擦擺平。」